ხელისუფლების მიერ წარმოებული ანტი-ლგბტქ+ პროპაგანდისა და სიძულვილის ენის ერთ-ერთ მთავარ მიზნად შესაძლოა მიჩნეულ იქნეს დასავლეთის მიმართ საწინააღმდეგო დამოკიდებულების გაღვივება საზოგადოებაში. ამის ეჭვს ბადებს ისიც, რომ სამთავრობო პროპაგანდისტული მედიები იზიარებენ სახელისუფლებო რიტორიკას და ცდილობენ, არარსებული ''ლგბტ პროპაგანდა'' დასავლეთს დაუკავშირონ. 

ძალადობის საპასუხოდ მოქალაქეს ერთადერთი მექანიზმი რჩება - მიმართოს პოლიციას დასახმარებლად, მაგრამ მაშინ როდესაც პოლიციაც ხელს უწყობს თავისი უმოქმედობით ძალადობის გაღვივებას, მოქალაქეს სხვა გზა აღარ რჩება გარდა ქვეყნის დატოვებისა - ,,მუქარის შემცველი წერილების მიღებისა და თავდასხმების შემდგომ თითოეულ ჯერზე მივმართე საპოლიციო ორგანოებს დასახმარებლად, თითქმის ყოველ კვირა ვწერდი საჩივარს. ვიცოდი, რომ პოლიციას შეეძლო ჩემი დაცვა, მაგრამ ამას განზრახ არ აკეთებდა. ისინი ჩემს მიმართ ცინიკურად და აგრესიულად იყვნენ განწყობილები. მათგან მომისმენია ისიც თუ როგორ შეურაცხყოფელად მოიხსენიებდნენ სექსუალური უმცირესობის წარმომადგენლებს. საქართველოს დატოვება გადავწყვიტე მაშინ, როდესაც ჩემი სიცოცხლის მოსპობის საკითხი რეალური გახდა’’ - ამბობს ლუკა აბლოთია ჩვენთან ინტერვიუში.
​
​​აშკარაა, რომ მმართველი პარტია არ ერიდება საკუთარი პოლიტიკური ინტერესებისათვის ადამიანთა უფლებების შეზღუდვას, საერთაშორისო და შიდა კანონმდებლობით ნაკისრი ვალდებულებების დარღვევას. ეს განსაკუთრებით თვალსაჩინო გახდა მას შემდეგ რაც ,,ქართულმა ოცნებამ'' ''რუსული კანონის’’ ინიციირებასთან ერთად ,,ოჯახური ღირებულებებისა და არასრულწლოვანის დაცვის შესახებ“ კანონპროექტის მიღება გადაწყვიტა, რომელიც არაფერია სხვა ვიდრე ლგბტქ+ თემის წინააღმდეგ მიმართული კანონი. კანონპროექტი პარლამენტმა პირველი მოსმენით  მიიღო. კონსტიტუციონალისტების შეფასებით, იგი წარმოადგენს საქართველოს კონსტიტუციის მეორე თავით გათვალისწინებული ფუნდამენტური უფლებების აშკარა შეზღუდვისაკენ მიმართულ მავნებლურ პოლიტიკურ ნაბიჯს, რომელიც ინსტიტუციური ჰომოფობიის აშკარა გამოვლენაა. აღნიშნული ინიციატივა სექსუალური ორიენტაციისა და გენდერული იდენტობის ნიშნით ჩაგვრასა და სისტემური უთანასწორობის გამძაფრებას გულისხმობს, რაც ხელს უწყობს საზოგადოებაში ჰომოფობიური, ძალადობრივი განწყობებისა და რადიკალური ჯგუფების გააქტიურებას, რომლებიც აშკარა საფრთხეს უქმნიან ქვეყანაში სოლიდარული და დემოკრატიული საზოგადოების მშენებლობას. აღსანიშნავია ისიც, რომ მამუკა მდინარაძემ, საპარლამენტო უმრავლესობის ლიდერმა კანონპროექტის განხილვებამდე განაცხადა შემდეგი: “ჩემთვის ძალიან ნიშანდობლივია, რომ „ნაციონალური მოძრაობა“, მისი „კლასტერი“ და მისი ტელევიზიები ძალიან შეშფოთდნენ ამ თემის გამო და მინდა დაგაწყნაროთ - ასეთი კანონპროექტის მიღება არ განიხილება სამართლებრივი მოსაზრებების გამო. იმის გამო, რომ თქვენ, რადიკალური ლგბტ პროპაგანდისტები, რადიკალური ძალები ამით პირიქით ისარგებლებთ. აბსოლუტურად სხვა რამეა ადამიანების, ნებისმიერი ჯგუფის წარმომადგენლების უფლების დაცვა, რასაც განუხრელად მისდევს ჩვენი ქვეყანა, არაერთი კანონია ამასთან დაკავშირებით მიღებული და არ დავუშვებთ, რომ რომელიმე ჯგუფის ინტერესები და უფლებები დაირღვეს. ამისგან, რა თქმა უნდა, უნდა გავმიჯნოთ ლგბტ პროპაგანდა''. მამუკა მდინარაძემ თქვა, რომ მისთვის მიუღებელი იქნება "ლგბტქ+ პროპაგანდის" შემზღუდავი ნებისმიერი კანონპროექტი.

მაშინ როდესაც ლგბტქ+ ადამიანები მათი უფლებების დაცულობის კუთხით არაერთი გამოწვევების წინაშე დგანან და ცხოვრების თითქმის ყველა სფეროში უთანასწორო მოპყრობისა და ამგვარი მოპყრობის რისკის წინაშე იმყოფებიან, ხელისუფლება, ნაცვლად იმისა რომ დგამდეს ქმედით ნაბიჯებს მათი მდგომარეობის გამოსასწორებლად, აღნიშნული პოპულისტური საკანონმდებლო ცვლილებით ცდილობს თავისუფალი და კრიტიკული აზრის ჩახშობასა და წლების განმავლობაში სისტემურად მარგანილიზებული ჯგუფის მეტად იზოლირებას. აღსანიშნავია, რომ პოლიტიკური ჰომოფობია, როგორც მეთოდი, წინასაარჩევნო პერიოდში, წლების განმავლობაში აქტიურად გამოიყენებოდა ამომრჩევლის ნებაზე ზემოქმედებისა და მხარდამჭერების მისამხრობად, ახლაც, აღნიშნული კანონის მიღებით სავარაუდოა, რომ ,,ქართული ოცნება’’ წინაასარჩევნო პერიოდში კონსერვატიულად განწყობილი ამომრჩევლის მოზიდვას ეცდება, ოპოზიციის მიმართ აგრესიის გაღვივებას ეცდება და საქართველოს ევროპისაგან დაშორების კამპანიაში კიდევ ერთ აგურს დადებს. აღნიშნულს ადასტურებს საქართველოს პრემიერ მინისტრის ირაკლი კობახიძის შემდეგი განცხადება: ''გამომდინარე იქიდან, რომ პროპაგანდა შეიცავს რისკებს, ვფიქრობთ, ეს საკითხი უნდა მოწესრიგდეს. როდესაც ოპოზიცია მხარს არ უჭერს ლგბტ პროპაგანდის საწინააღმდეგო კანონპროექტს, ეს ნიშნავს, რომ ოპოზიცია მხარს უჭერს ლგბტ პროპაგანდას, რაც ჩვენთვის კატეგორიულად მიუღებელია“.